Daily Archives: ஜூலை 6, 2006

Copyrights Reserved for and of Kalachuvadu

காலச்சுவடு வலையகத்தின் காப்புரிமை பக்கம்/அறிக்கை.


| |

Advertisements

Incentive Suggestions for the Indian Farmer

Dinamani.com – Editorial Page

உழவுத்தொழில் மீட்சி பெற! :: அ. பிச்சை

“”உண்மையான இந்தியா கிராமங்களில்தான் வாழ்கிறது; நகரங்களில் அல்ல” என தேசப்பிதா காந்தியடிகள் ஆயிரம் முறை அழுத்தம் திருத்தமாகச் சொன்னார். ஆனால் இன்று கிராமியப் பொருளாதாரம் சிதைந்து வருகிறது. கிராமங்கள் உயிரற்ற சடலங்களாக மாறி வருகின்றன. பண்டித ஜவாஹர்லால் நேரு 15-08-1947 அன்று நிகழ்த்திய தனது சுதந்திர தின உரையில் “”இந்தியாவில் எதுவும் காத்திருக்கலாம்; ஆனால் விவசாயம் காத்திருக்க முடியாது” (Everything else can wait in India; but not agriculture) எனப் பகிரங்கமாக அறிவித்தார். இதனை எல்லோரும் மறந்து விட்டார்கள் – ஆட்சியாளர்கள் உட்பட. 60 ஆண்டுகள் காத்திருந்த விவசாயிக்கு இன்னும் விமோசனம் ஏற்பட்டபாடில்லை.

படித்து, பட்டம் பெற்று, உற்சாகத்தோடும், நம்பிக்கையோடும் உழவுத் தொழிலை ஏற்றுக் கொண்ட ஓர் இளைஞனைக் கேட்டேன். அவர் சொன்னார்:

விவசாயம் கொஞ்சமும் கட்டுபடி ஆகவில்லை; மழை இன்மையால் கிணறு வறண்டுவிட்டது; விவசாயக் கூலியும், செலவும் நாளும் கூடுகின்றன; விளைபொருள்களுக்குக் கட்டுபடியான விலை கிடைப்பதில்லை; கடன் வாங்க விரும்பாத நான், கடனுக்குள் மூழ்கி விட்டேன். என்னால் இனிமேலும் விவசாயத்தில் தாக்குப் பிடிக்க முடியாது; விவசாயக் கூலியாக வெளிநாடு போக வழி இருந்தால் சொல்லுங்கள்”

– என்றார். இவரது பேச்சுதான் கிராம விவசாயிகளின் எதார்த்த நிலையை உணர்த்தியது. இதுகேட்டு நான் மிகவும் அதிர்ந்து போனேன். ஆனாலும் கிராமத்து விவசாயிகளின் உண்மை நிலை இதுதான்.

இப்படிப்பட்ட இருண்ட சூழலில்தான், அரசின் சமீபகால அறிவிப்புகள், ஓரளவு நம்பிக்கை ஒளியைத் தருவதாக உள்ளன. அவை:

  • விவசாயக் கூட்டுறவுக் கடன் தள்ளுபடி.
  • விவசாயத்திற்கு இலவச மின்சாரம்.
  • சில அத்தியாவசியப் பொருள்களுக்கு மானியம்.

    உண்மையில் தற்கொலைப் பாதையின் விளிம்பில் தள்ளாடிக் கொண்டிருக்கும் விவசாயிகளின் துயரங்களுக்கு இவை முழுமையான விடியலைத் தராவிட்டாலும், சிறிது வெளிச்சத்தையாவது தரலாம்!

    இந்திய மூலதனச் சீரமைப்பு நிறுவனம் (Assets Reconstruction Company of India) என்ற ஓர் அமைப்பு ஒரு முக்கியத் தகவலை வெளியிட்டுள்ளது (ஆதாரம்: The New Indian Express, Dated 04-01-2006). அதன்படி பெரும்பாலும் நகர்ப்புறங்களில் வாழும் வசதி படைத்தவர்கள், இந்தியா முழுவதும் உள்ள வங்கிகளிலிருந்து, தொழில் கடன் பெற்று, அவற்றைத் திருப்பிக் கட்டாமல், வராக் கடன் என்று கணக்கிடப்பட்டிருக்கும் தொகை ரூ. 2,36,000 கோடியாம்! இதில் தள்ளுபடி செய்யப்பட்ட தொகை: ரூ. 77,000 கோடி. தொழில் கடனைத் தள்ளுபடி செய்தது சரி என்றால், விவசாயக் கடன் தள்ளுபடியும் நியாயம்தானே!

    வளர்ந்த நாடுகளில் விவசாயத்திற்கு பெருமளவு மானியம் வழங்குகிறார்கள். அதன் மூலம் விவசாயம் பட்டுப்போகாமல் பாதுகாக்கிறார்கள். ஆங்கிலேய அரச குடும்பத்தினர் கூட இத்தகைய மானியத்தைப் பெறுகிறார்கள்! நமக்கு இது வியப்பாக இருக்கலாம்; ஆனால் இங்கிலாந்தில் இது விதி அல்லது நடைமுறை.

    பிரிட்டிஷ் அரசி இரண்டாம் எலிசபெத் 2003 – 2004ஆம் ஆண்டில் பெற்ற மானியம்: 13 லட்சம் அமெரிக்க டாலர் (ஒரு டாலர் சுமார் 45 ரூபாய்). இளவரசர் சார்லஸ் பெற்றது: 4.8 லட்சம் டாலர். காரணம்: இருவரும் சொந்தத்தில் விவசாயப் பண்ணை வைத்திருக்கிறார்களாம்.

    டென்மார்க் இளவரசர் ஜோகிம் 2003-ல் பெற்ற விவசாய மானியம்: 2.2 லட்சம் டாலர். தெற்கு ஜெட்லாண்டில் அவரது பண்ணைக்குக் கிடைத்த மானியம் இது. இங்கிலாந்தின் பெரும் பணக்காரர் வெஸ்ட் மின்ஸ்டர் டியூக் 1200 பசுக்கள் வைத்து வளர்க்கிறாராம்! அதற்காக ஆண்டொன்றுக்கு அவர் பெறும் மானியம்: 5.5 லட்சம் டாலர். அதாவது நாள் ஒன்றுக்கு பசு ஒன்றுக்கு 1.3 டாலர் மானியம் வழங்கப்படுகிறது.

    அமெரிக்காவில் விவசாய மானியம் பெற்றவர்களில் தொழில் அதிபர்கள் டேவிட் ராக் பெல்லரும், டெட் டர்னரும் அடங்குவார்கள்! அரச பரம்பரையினர் மட்டுமல்ல, அரசியல் தலைவர்களும் இத்தகைய விவசாய மானியம் பெறுபவர்களே!

    அமெரிக்காவில் 25,000 பருத்தி விவசாயிகள் மானியம் பெறுகிறார்கள். அவர்கள் அனைவரும் மொத்தமாக நாள் ஒன்றுக்குப் பெறுவது: 101 லட்சம் டாலர். ஜெர்மனியில் உள்ள 136 பால் பண்ணைக் கம்பெனிகளுக்கு 78 மில்லியன் டாலர் ஏற்றுமதி மானியம் வழங்கப்பட்டு வருகிறது.

    ஜப்பானில் உள்ள பசு ஒன்றுக்கு, நாள் ஒன்றுக்கு 8 டாலர் மானியம் கொடுக்கப்படுகிறது. இந்தியாவில் வாழும் 60 கோடி விவசாயக் குடும்பங்களில், பாதிக் குடும்பங்கள் நாள் ஒன்றுக்கு 1.5 டாலரில் (ரூ. 75) தான் தங்கள் வயிற்றைக் கழுவுகிறார்கள்! இதனைப் பார்த்தால் ஏழை இந்தியனைவிட, ஜப்பானியப் பசுக்கள் அதிர்ஷ்டசாலிகளே!

    இந்நிலையில் இந்திய விவசாயிகளுக்கு இன்று வழங்கப்படும் மிகக் குறைந்த மானியத்தைக்கூட, நீக்க முயற்சிப்பது வேதனையிலும் வேதனை.

    வளர்ந்த நாடுகளில் சராசரி குடும்ப வருமானத்தைவிட, சராசரி விவசாயக் குடும்ப வருமானம் அதிகமாக உள்ளது. ஆனால் இந்தியாவிலோ தலைகீழ் மாற்றம். இந்திய தேசிய வருமானம் பற்றிய புள்ளிவிவரத்தில் கடைசியில் இருப்பவர்கள் விவசாயிகளே!

    வேளாண்மை வளர, விவசாயிகள் உயர வழிமுறைகள்:

  • வேளாண் நிலங்களை அரசு உழுபவனுக்கே உடமை ஆக்குவதற்கு, மோதல் இல்லாமல் முறையான நடவடிக்கையை மேற்கொள்ள வேண்டும். நில உரிமையாளருக்கு உரிய இழப்பீட்டுத் தொகையை வழங்க அரசு முன்வர வேண்டும்.
  • தரமான விதைகளைக் குறைந்த விலையில் அல்லது மானியத்துடன் விவசாயிகளுக்கு உரிய காலத்தில் வழங்க வேண்டும்.
  • வங்கியில் பணிபுரிவோர் வீடு கட்டுவதற்கு வட்டியில்லாக் கடன் வழங்கிய காலம் உண்டு. அதேபோல் விவசாயிகளுக்கு வட்டியில்லாக் கடன் அல்லது 4% வட்டியில் கடன் வழங்க வேண்டும்.
  • அரசுப் பணியாளர்களுக்கும், தொழிலாளர்களுக்கும் Cost of Living Index – வாழ்க்கைச் செலவுக் குறையீட்டு எண் அடிப்படையில் ஊதியத்துடன் இணைந்த அகவிலைப்படியை நிர்ணயம் செய்கிறார்கள். அதேபோல் விளைபொருள்களின் விலையை ஆண்டுதோறும் உற்பத்திச் செலவையும் நியாயமாகத் தர வேண்டிய லாபத்தையும் சேர்த்து நிர்ணயம் செய்ய வேண்டும். நுகர்வோருக்குக் குறைந்த விலையில் பொருள்களைத் தர வேண்டுமெனில், விலை வித்தியாசத்தை அரசு மானியமாக ஏற்க வேண்டும்.
  • விவசாயி வீட்டுப் பிள்ளைகளுக்குத் தகுதி அடிப்படையில் பொறியியல், மருத்துவம் போன்ற உயர் படிப்புக்கு இடம் கிடைத்தால், கல்விச் செலவை அரசே ஏற்க வேண்டும்.
  • நோய் வந்தால் வைத்தியம் செய்ய விவசாயிக்கு வசதியில்லை. ஆகவே அவனுக்குத் தரமான மருத்துவ வசதி இலவசமாக வழங்கும் வகையில், வட்டார அளவில் அரசு மருத்துவமனைகளின் தரமும், பணியின் தன்மையும், நிலையும் உயர்த்தப்பட வேண்டும்.
  • விவசாயக் குடும்பத்தின் தலைவன் 50 வயதுக்குள் இறந்து விட்டால், பாதுகாப்பைக் கருத்தில்கொண்டு, பரிவுத்தொகை ரூ. 50,000 வழங்கப்பட வேண்டும்.

    சுருங்கச் சொன்னால் நாடு வேகமாக வளர்கிறது என்று சொல்லுகிறார்கள். அத்தகைய வளர்ச்சியின் பயன் கிராமப்புற விவசாயிகளுக்கும் போய்ச் சேருமாறு உறுதி செய்யப்பட வேண்டும்.

    “”ஒரு செயலைச் செய்யும்போது, தயக்கம் ஏற்பட்டால் அச் செயலால், இத் தேசத்தின் கடைநிலை மனிதனின் கண்ணீர் துடைக்கப்படுமா? என்ற கேள்வியைக் கேள். “ஆம்’ எனப் பதில் கிடைத்தால், அதைத் துணிந்து செய்” – என்றார் காந்திஜி.

    இன்று இத் தேசத்தில் வாழ்வின் கடைநிலையில் இருப்பவர்கள் விவசாயிகளே! ஆகவே மத்திய, மாநில அரசுகள் செய்கிற ஒவ்வொரு செயலாலும், திட்டத்தாலும் ஏழை விவசாயி ஏற்றம் பெறுவானா என எண்ணிப் பார்த்துச் செயல்பட வேண்டும்.

  • Copyrights Reserved for and of Kalachuvadu 

    Copyrights Reserved for and of Kalachuvadu Posted by Picasa

    Scarface & Pudhupettai

    புதுப்பேட்டை தொடர்பான எண்ணற்ற விமர்சனங்களில் பிபி-யின் பார்வை எண்பதுகளின் ஸ்கார்·பேஸையும் புதுப்பேட்டையையும் ஒப்புவித்திருந்தது. புதுப்பேட்டையை மேமிரா ப்ரிண்ட்டிலும் ஸ்கார்·பேஸ் ஒளித்தகடையும் ஓட்டவிட்டு பார்த்தபின் எழுந்த சில எண்ணங்கள்.

    ஸ்கார்·பேஸ்: க்யூபாவில் இருந்து அமெரிக்காவுக்கு அகதியாய் பஞ்சம் பிழைக்க வரும் டோனி மொண்டானா என்னும் கிரிமினலின் கதை. அவனுக்கு லாபமாக இருக்கும் வரை, எந்த செய்கையும் சரி என்னும் நியாயத்தின்படி முன்னேறுபவன். பள்ளியில், கல்லூரியில் ஆதர்ச நாயகனைத் தேடியலையும் இளம்பிஞ்சு போல், தன்னுடைய கஞ்சாத் தொழிலின் உதாரண புருஷனின் காதலியையும், சாம்ராஜ்யத்தையும் எப்பாடு பட்டாவது அடைந்து விடுபவன்.

    புதுப்பேட்டை: கொக்கி குமாருக்கு ஆதர்ச நாயகர்கள் கிடையாது. அவனும் வீட்டை விட்டு ஓடி வந்தவன் தான். ஆனால், டோனி மொண்டானா போல் ஹோட்டலில் பாத்திரம் கழுவும் வேலை கூட கிடைக்காமல் பிச்சை எடுக்க விதிக்கப்பட்டவன். டோனி போலவே இன்ச் இன்ச்சாய் திட்டம் தீட்டாமல் முன்னேறுபவன். வாக்கு சாதுர்யம், சமயோசிதம் என்று ஒவ்வொரு கல்யாண குணத்துக்கும் ஒரு காட்சி வைக்க திரைக்கதையில் இடமில்லாததால், பாட்டும் கூத்துமாய் படத்தைக் கழிப்பவன்.

    ஸ்கார்·பேஸ்: விதிமுறைகள் சொல்லித்தரப்படுகிறது:
    1. அடுத்தவனின் ஆசையை குறைத்து மதிப்பிடாதே!
    2. உன்னுடைய சரக்கில் நீயே உச்சமாகி மதியிழக்காதே!

    புதுப்பேட்டை: செய்முறைகள் சொல்லித்தரப்படுகிறது:
    1. சடார்னு அரை நிமிஷம் எட்டிப் பார்க்கணும். மொத்த சூழ்நிலையும் உள் வாங்கிக்கணும்.
    2. பயமாத்தான் இருக்கணும். உன் உசிர் மேல் உனக்கு பயம் இருந்தாத்தான் நல்லது.

    ஸ்கார்·பேஸ்: ஆல் பசினோவினால்தான் படம் தலை நிமிர்ந்து நிற்கிறது. ஆனால், ஆல் பசினோ என்னும் ஆளுமை வெளிப்படாமல், க்யூபா நாட்டு கடத்தல்காரன் மட்டுமே தெரிகிறான். டோனி மொண்டானாவின் ‘உலகம் பிறந்தது எனக்காக’ என்னும் பேராசையும், பாசமுள்ள அண்ணனின் அரக்கத்தனமான ஆளுமை கலந்த அழுக்காறும் மட்டுமே வெளிப்படும்.

    புதுப்பேட்டை: தனுஷ் மட்டுமே படத்தை நிமிர்த்தி உட்கார வைக்கிறார். முதல் கொலையை கை நடுங்க செய்யும் +2 மாணவன் முதல் மனைவியை முதலிரவில் மிரட்டும் காமாந்தகன் வரை கொக்கி குமாராகத்தான் வலம் வருகிறார்.

    ஸ்கார்·பேஸ்: வசனகர்த்தா இங்கே மின்னுவார்…
    * ‘என்னடா பார்க்கறீங்க? போக்கத்த வெட்டிப்பசங்களா… எப்படி வாழணுமோ அப்படி வாழக்கூட தைரியமில்லாத பொட்டைங்கடா நீங்க. உங்களுக்கு என்னை மாதிரி சோமாரிங்க வேணும். என்னக் காமிச்சு ‘அவனப் பார்த்தியா? கெட்ட பையன்’ என்று சொல்லணும். உன்னை எது நல்லவனா ஆக்குது? உனக்கு எதை மறைக்கணும்னு தெரிஞ்சிருக்கு. எப்படி பொய் சொல்லணுமோ அப்படி சொல்றே. நான் எப்போதும் உண்மைதான் பேசுவேன். பொய் சொல்லும்போது கூட’

    புதுப்பேட்டை: சோனியா அகர்வாலுடன் முதலிரவில் தனுஷ் பேசுவதும், குழந்தையைக் காப்பாற்ற கோரும்போது சோனியாவின் பதிலடியும்.

    ஸ்கார்·பேஸ்: எல்லாம் தெரிந்தவன் பொய் சொல்ல மாட்டான். முழு விவரங்களும் அறிந்தவனுக்கு, பலாபலன்கள் விளங்குவதால் எதைக் கண்டாலும் பயம் தொற்றிக் கொள்ளும். டோனி மொண்டானாவுக்கு உள்ளங்கையில் உலகம் வேண்டும். எப்பொழுதாவதுதான் உண்மை பேசுவான்.

    புதுப்பேட்டை: தன் பலம் அறிந்தவனுக்கு பயம் இருக்காது. பலவீனங்களை நிரப்பும் வகை அறிந்து, உரியவர்களை நியமித்துக் கொள்வான். கொக்கி குமாருக்கோ குருட்டு தைரியம். எதிராளிகளை எப்பொழுதும் போட்டுத் தள்ளுவான்.

    ஸ்கார்·பேஸ்: டோனியின் வலது கரம் ‘மானி’. மனைவி+காதலி ‘எல்விடேர்’. முதல் முதலாளி ‘·ப்ரான்க்’ என்று எல்லாருக்குமே படத்தில் போதிய இடம் உண்டு. அவர்களைப் புரிந்து கொள்வதன் மூலம் டோனி ஏன் இப்படி நடந்து கொள்கிறான் என்பது புரிகிறது.

    புதுப்பேட்டை: மனைவி, காதலி, நண்பர் குழாம், அரசியல் தலைவர் என்று சப்போர்டிங் நிறைய இருந்தாலும் ஒருவர் கூட கொக்கி குமார் சித்திரத்தை முழுமையாக்க உதவவில்லை.

    ஸ்கார்·பேஸ்: கெடுவான் கேடு நினைப்பான் என்று எதற்காக ஓடுகிறோம்? என்ன சம்பாதித்து எதைக் கண்டோம் என்பவனாக விரக்தி மனப்பான்மைக்குத் தள்ளப்பட்டு, தன்னுடைய வலையில் தானே வீழும் – மாற்றங்களின் முன்னேற்றத்தின் ஒவ்வொரு படியிலும் பார்வையாளன் அழைத்து செல்லப்படுகிறான்.

    புதுப்பேட்டை: முக்கியமான திருப்பங்கள் எப்படி சாத்தியப்பட்டது என்பது ஹீரோயிஸ பாவமாக படத்தின் வேகத்தில் விழுங்கப்பட்டு, சிதைக்கப்படுகிறது. பாடல்களில் சண்டைக்காட்சிகளும், சண்டைக்காட்சிகளில் அரசியல்வாதிகளும், கூட்டங்களில் இருட்டடிக்கப்பட்டு, வளர்ச்சியின் பரிணாம காரண காரியங்கள் விழுங்கப்பட்டுவிடுகிறது.

    ஸ்கார்·பேஸ்: இங்கு ஒரே ஒரு நாயகிதான். தூசு படிந்த திரைச்சீலை போல் டோனியினுடைய அராஜக வாழ்க்கையை மறைப்பதற்காக பயன்படுகிறாள். ஆட்சி மாறியதும் கை மாறும் கிரீடம் போல் பட்டத்தரசியும் இடம் மாறித் தொடர்கிறாள். டோனியின் வெறுமையையும் இலட்சியத்தையும் வெளிக்கொணர பெரிதும் உதவும் குணச்சித்திரம்.

    புதுப்பேட்டை: இரு நாயகிகள். ஸ்னேஹா போன்ற சீரிய லட்சணங்கள் பொருந்திய இற்பரத்தையுடன் டூயட் பாடாதது மட்டுமே நிஜத்தை பிரதிபலிக்கும் முயற்சியை சொல்கிறது. சோனியாவை மணம் முடிக்க நியாயப்படுத்தும் காரணங்களும் சந்தர்ப்பமும், மனித வாழ்வின் வெகு யதார்த்தம். ஆனால், இருவருமே குமாரின் நடவடிக்கைகளுக்கும் எண்ணவோட்டத்திற்கும் எந்தவிதத்திலும் பயன்படவில்லை.

    ஸ்கார்·பேஸ்: டோனி என்பவன் முரண்களின் உறைவிடம். குழந்தைகளுக்குப் போதைப் பொருள் விற்பதற்காக கொள்முதல் வியாபாரம் செய்பவன். ஆனால், குழந்தைகளைக் கொல்வதற்கு மனம் பதை பதைப்பவன். தங்கையின் நல்வாழ்வை வேண்டுபவன். ஆனால், தங்கையின் காதலர்களை வதைப்பவன்.

    புதுப்பேட்டை: குமாரும் மனிதன் தான். முரண்களால் ஆனவன். தந்தையை வெறுப்பவன். தானே தந்தையானதும் வெறுக்கத்தக்க செய்கையை செய்யும்படி ஆனவன். விலைமாதுவை மணம் முடித்தாலும் ஆணுக்குத் தோன்றும் ஆழ் அச்சம் துளிக் கூட எட்டிப் பார்க்காமல் இருப்பவன்.

    ஸ்கார்·பேஸ்: தன்னை நம்புபவர்களை கைவிடுவது தான் அடிநாதம். அதை நம்பும்படியாக சொல்வதற்கு, காவல்துறை உயர் அதிகாரிகளையும் போதை தடுப்பு அலுவலர்களையும் நாடி அவர்களின் உதவியோடு எடுக்கப்பட்டது.

    புதுப்பேட்டை: யார் மீதும் நம்பிக்கை வைக்கமுடியாதது தான் அடிநாதம். மெய்யை பிரதிபலிக்கும்படியாக எடுப்பதற்கு, அரசியல் கட்சித் தலைவர்களையும் கூலிக்கு உயிரெடுப்பவர்களையும் கண்டு பேட்டியெடுக்காமல் திரையாக்கியது.

    ஸ்கார்·பேஸ்: எண்பதுகளின் தலை சிறந்த படமாக இல்லாவிட்டாலும்; ஆல் பசினோவின் முத்திரை நடிப்பாகவும், போதை அரசர்களின் இறுதியை துல்லியமாகவும், சரக்குகாரர்களின் வாழ்க்கை சுழற்சியைப் படம் பிடித்ததற்காகவும் கொண்டாடப்படும்.

    புதுப்பேட்டை: செல்வராகவனின் தலை சிறந்த படமாக இல்லாவிட்டாலும்; தனுஷ¤க்கு மைல்கல்லாகவும், தேர்தல்-வேட்பாளர்-தாதா பிணைப்பை இலகுவாக வெளிக்கொணருவதிலும், வரைவின் மகளிர் வாழ்க்கையை சித்தரிப்பதிலும் முக்கியமான படமாகக் கருதப்படும்.

    தமிழோவியத்திற்கு நன்றி.


    | | |

    Koratala Satyanarayana

    மார்க்சிஸ்ட் கம்யூனிஸ்ட் பிரமுகர் கொரதாலா சத்யநாராயணா அஞ்சலி

    தமிழோவியத்திற்கு நன்றி.

    மார்க்சிஸ்ட் கம்யூனிஸ்ட் கட்சியில் முண்ணனித் தலைவர்களுள் ஒருவரான கொரதாலா சத்யநாராயணா, தன்னுடைய 83ஆம் வயதில் ஜூலை 1, சனிக்கிழமை இயற்கை எய்தினார். கடந்த ஆறு மாதங்களாக புற்றுநோய்க்கு சிகிச்சை எடுத்து வந்தவர், பலனில்லாமல் காலை 8:30க்கு மறைந்தார்.

    சுதந்திரப் போராட்டத்தில் கலந்து கொண்டு பல எழுச்சிகளுக்குத் தலைமை வகித்தவர். ஆந்திராவில் கம்யூனிஸ சித்தாந்தத்தை பரவலாக வித்திட்டதில் முக்கிய பங்கு சத்யநாராயணாவைச் சாரும்.

    குண்டூர் மாவட்டத்தில் இருக்கும் ரேபாலே (Repalle) தொகுதியில் இருந்து 1962இல் முதன் முறையாக சட்டசபைக்குத் தேர்ந்தெடுக்கப்பட்டார். அதே தொகுதியில் இருந்து 1978இலும் சட்டசபைக்கு சென்றார்.

    ஆந்திர மாநில மார்க்சிஸ்ட் கம்யூனிஸ்ட் கட்சியின் செயலாளராக 1991 முதல் 1997 வரை பணியாற்றினார். மார்க்சிஸ்ட் கம்யூனிஸ்ட் கட்சியின் பொலிட்பீரோ உறுப்பினராக 2002 to 2005 வரை செயல்பட்டார். ஆந்திர விவசாயிகளின் நலனைக் கருத்தில் கொண்டு, அவர்களின் வாழ்வியல் சிக்கல்களைத் தீர்க்கவும் உழவர் முன்னேற்ற திட்டங்களை உருவாக்குவதிலும் பெரும் அக்கறையுடன் ஈடுபட்டவர்.

    விவசாயத் தொழிலாளர்களை ஒருங்கிணைத்து கூட்டமைப்பு அமைப்பதிலும், அமைப்பு சாராதவர்களை கிசான் சபைகள் மூலம் யூனியன் உறுப்பினர்களாக ஆக்குவதிலும் தீவிரம் காட்டியவர். மார்க்சிஸ்ட்-லெனின் கோட்பாடுகளைப் பரப்புவதில் முனைந்ததால், மூன்றாண்டுகள் சிறைவாசமும் நான்கரை வருடங்கள் தலைமறைவாகவும் செயல்பட்டவர்.

    மனைவி சுசீலாவும், இரு மகன்களும், ஒரு மகளும் சத்யநாராயணாவுக்கு இருக்கின்றனர்.

    சத்யநாராயணா தெலுங்கானாப் போராட்டத்திலும் பங்கு கொண்டவர். பணக்கார நிலச்சுவான்தார் குடும்பத்தில் பிறந்திருந்தாலும், ஆந்திர பிரதேஷ் ரைது சங்கம் அமைப்பை நிறுவி, உழவர்களின் சக்தியை பிணைத்து, நிலக்கடன், விவசாயிகளின் தற்கொலைகள் போன்ற பல சோதனைகளில் இருந்து மீள வகை கண்டவர்.

    பிரஜாசக்தி சஹிதி சமஸ்தா அமைப்பின் தலைவராக இருந்தபோது தீவிரவாதத்தை தீர்வாக எண்ணும் நக்ஸல்பாரிகளை ஜனநாயகத்தின் வழி திரும்ப பெரும் தூண்டுதலாக விளங்கினார். மொன்சாண்டோ ஒப்பந்தத்தின் படி, சுற்றுச்சூழலை பாதிக்கக் கூடிய மாறுபட்ட பருத்தி விதைகளை பயன்படுத்துவதை எதிர்த்தவர்.

    செய்தி & தகவல்: யூ.என்.ஐ. | தொடர்புள்ள பக்கம்: விக்கி


    | |