Daily Archives: ஏப்ரல் 19, 2005

கல்யாணம் பண்ணியும் பிரம்மச்சாரி

சென்னையில் புத்தகம் என்றால் ‘ஹிக்கின்பாதம்ஸ்’ நினைவுக்கு வரும். அதன் பிறகு பெங்களூர் வாசத்தில் ‘கங்காராம்ஸ்’ பிடித்திருந்தது. ஹிக்கின்பாதம்ஸில் வாஸ்து பார்க்கிறார்கள் என்று நினைக்கிறேன். தென்மேற்கு மூலையில் ஒதுக்குப்புறமாக தமிழ் புத்தகங்கள் வைத்திருப்பார்கள். நியு புக்லேண்ட்ஸில்தான் உருப்படியான வரிசையில் நிறைய தமிழ் புத்தகங்கள் கிடைக்கும் என்றார் ஆனந்த் ராகவ். ஆட்டோகாரர்களுக்கு எளிதில் புரியவேண்டும் என்பதற்காக ஆங்கிலப் பெயர் வைத்துக் கொண்டிருப்பார்கள் என்று நினைத்துக் கொண்டேன். மரங்களும் பெண்மணிகளும் நிறைந்த குளுகுளு தி.நகரில் (52-C, கீழ் தளம், வடக்கு உஸ்மான் ரோடு) இருக்கும் புண்ணியஸ்தலம் புக்லேண்ட்ஸ். மாமிகளும் தண்ணீர் இல்லாத குளங்களும் நிறைந்த மயிலையில் திலீப் குமார் கடையும் (216/10, ராமகிருஷ்ண மடம் சாலை) சென்னை ஷேத்ராடனத்தில் அவசியம் இடம்பெற வேண்டும். (இரண்டு முகவரிக்கும் நன்றி: Kizhakku Pathippagam)

ஈழநாதனின் சிங்கை நூலக அனுபவங்களை பெற இயலாதவர்கள் நிச்சயம் மேற்கண்ட ஏதாவதொன்றுக்கு வருடத்துக்கு ஒரு முறையாவது சென்று வருவார்கள். நூலகங்களில் குவிந்து கிடக்கும் புத்தகங்களை இணையம் மூலமாக அலசுவது சௌகரியமான விஷயம். அதை விட்டு விட்டு, நூறாண்டுகளாக அடைக்கப்பட்ட சந்திரமுகியின் அறையில் நுழைவது போல் இல்லாவிட்டாலும் தூசி வாசனையடிக்கும் பெரிய அடுக்குகளுக்கு நடுவே சுற்றித் திரிவது இன்னொரு சௌகரியமான பொழுதுபோக்கு. இவற்றை மட்டும் நம் வீட்டில் வைத்திருந்தால் நூலாம்படை தட்டவே வாரயிறுதிக்கள் செலவழியுமே என்னும் எண்ணமும் சம்பந்தமில்லாமல் தோன்றும்.

சில புத்தகங்கள் பின்னட்டைக் குறிப்புகளில் கவரும். சில முகப்பு அட்டையின் புகைப்படத்தினால். இவை இரண்டு வகையுமே கிட்டத்தட்ட AnyIndian.com போன்ற இணையத்தின் மூலமே எளிதில் சாத்தியமாகிறது. இவ்வாறு நோட்டமிடுவதில் புகழ் பெற்ற எழுத்தாளர்களும் திண்ணை போன்றவற்றில் வெளியான மதிப்புரைகளில் கவர்ந்தவையும் விருப்பப்பட்டியலில் இடம்பிடிக்கும். சில பல லிஸ்ட்களின் உதவியை நாடியும் வாங்கலாம்.

ஆனால், இவ்வாறு (மட்டுமே) வாங்கினால் எனக்கு பிடித்திருக்கக் கூடிய பல புத்தகங்கள் தட்டிப் போகிறது. இணையம் மூலமே கிடைக்கக்கூடிய தகவல் சார்ந்த புத்தகங்கள் சிலவும் தேவையில்லாமல் சேர்ந்துவிடலாம். சுஜாதாவின் எல்லா எழுத்தையும் வாங்கி (படித்தும்) விட வேண்டும் என்னும் ஆவலுடன் எடுத்து வைக்க சொன்னேன். மொத்தமாக பார்த்தபோது பிரமிப்பாக இருந்தது. நிரையவே மிரண்டுபோய், நூறு புத்தகங்கள் சுஜாதாவுக்கு quota வைக்க முடிவு செய்து, புரட்டி, எடை அளந்து, தொடர்கதை சிலவற்றை ஒதுக்கி, எடுக்க முடிந்தது.

எஸ்.ராவின் உலகசினிமாவும் மிகவும் ஆர்வமாகப் பார்க்க நுழைந்த ‘பாபா’ படம் போல் சப்பென்று போனது. பாபா படம் போலவே நிறைய மேட்டர் இருந்தது. ஆனால், imdb.com ரோஜர்/ஈபெர்ட் தலை நூறு பட்டியல் போன்ற விவரங்கள். இதுதான் எனக்கு இன்னும் எளிதாக கைநுனி இணையம் வழியாகக் கிடைக்கிறதே என்ற அலட்சியம் எட்டிப் பார்க்க shelf-இலேயே திருப்ப ஏதுவாகிறது.

பசும்பொன் குறித்த புத்தகங்களைப் பார்த்தபோது பெருத்த ஏமாற்றம் மட்டுமே விஞ்சியது. வாங்க வேண்டிய பு(து)த்தகங்களில் பலவும் இணைப்பு துண்டிக்கப்பட்ட தரவிறக்கமாகிப் போனது. ரொம்ப காலமாகத் தேடிக் கொண்டிருந்த (ஆனால் லிஸ்ட்டில் இல்லாத/மறந்து போன) மௌனி மாட்டிக் கொண்டார்.

கலைமகள் களஞ்சியத்தின் இரண்டாம் பாகம் தேவையில்லை என்றால் ‘இரண்டையுமே சேர்த்து எடுத்துக் கொள்ளவேண்டும்’ என்று மிரட்டுகிறார்கள். தொகுப்பின் இரண்டாம் பாகம் முழுவதும் சிறுகதைகளே நிறைந்திருந்தது. கட்டுரைகள் மட்டுமே பிரியமாக இருக்கும் என்னுடைய தற்கால வாசிப்புக்கு வேண்டாத சுமையாக இருக்குமே என்று நினைத்தால் negotiation-க்கு வேலை வைத்தார்கள்.

அசோகமித்திரனும் தனது கிழக்குக் கட்டுரைத் தொகுப்பின் முதல் பாகத்தில், எனக்கு ஏனோ சாய்ஸில் விட்டுவிடத் தூண்டினார். அதற்கும் ஒன்று எடுத்தாலே மற்றொரு புத்தகம் (இரண்டும் தனித்தனியே 350 ரூபாய்) என்று ஆசை காட்டினாலும் கடைசியில் தனியே தர சம்மதிக்கிறார்கள். இணைம் மூலம் இந்த மாதிரி (என்னுடைய) அடாவடித்தனம் செல்லுபடியாகுமா என்று தெரியவில்லை 😉

மொத்தமாக வாங்கிய புத்தகங்கள் இன்னும் இரண்டு மாதம் கழித்துதான் வந்து சேரும் என்றாலும் நிச்சயதார்த்தம் முடிந்து கல்யாணத்துக்கு காத்திருக்கும் பிரம்மச்சாரி போன்ற சுகமான காலம் இது.


Noolagam – Interview with Mr. Ramalingam – Narmada Pathippagam:
“ஒரே கூரையின் கீழ் எல்லா தமிழ் நூல்களும்” என்கிற விதத்தில் உருவாக்கப்பட்ட ‘புக் லேண்ட்ஸ்’ பற்றி…?

தமிழில் ஒவ்வொரு பதிப்பாளரும் ஒரு (ஆஸ்தான) எழுத்தாளருடைய நூல்களையே அதிகம் வெளியிடுகிறார்கள். குறிப்பாக, மு.வ. நூல்களென்றால் பாரி, நா.பா. – தமிழ்ப் புத்தகாலயம், ஜெயகாந்தன் – மீனாட்சி, கலைஞர் – பாரதி, சுஜாதா – இமயம். இந்த பதிப்பாளர்களெல்லாம் ஆளுக்கொரு திசையில் சிதறிக்கிடக்கிறார்கள். அதனாலே வெளியூரிலிருந்தோ, வெளிநாட்டிலிருந்தோ புத்தகம் வாங்க வருபவர்கள் ரொம்ப கஷ்டப்படுகிறார்கள். அதனாலே, ஒரே இடத்தில் எல்லா நூல்களும் விற்பனைக்கு கிடைத்தால் வசதியாக இருக்கும் என்பதால்தான் புக்லேண்டை ஆரம்பித்தோம். தமிழில் ஒரு சில புத்தகங்களை மட்டுமே வெளியிட்ட பதிப்பகங்கள் நிறைய இருக்கின்றன. அவர்களின் நூல்களை சந்தைப்படுத்துவதற்கும் இந்த புக்லேண்ட்ஸ் உதவிகரமாக இருக்கிறது.

முக்கியமாக, சென்னையில் உள்ள நவீன, குளிர்சாதன வசதி கொண்ட நூல் விற்பனைக்கூடத்தில் ஆங்கில நூல்கள் மட்டுமே அதிக அளவில் விற்பனைக்கு வைக்கப்படுகின்றன. தமிழ் நூல்களை அவர்கள் விற்க விரும்பவதில்லை. தமிழ் நூல்களை விற்கும் ஓரிரு நிறுவனங்களும் அவற்றை தற்போது குறைத்துக் கொண்டு வருகின்றன. இந்த நிலையை மாற்றி தமிழ் நூல்களை விற்பனை செய்யும் நோக்கத்தோடு அமைக்கப்பட்டதுதான், புக்லேண்ட்ஸ்.”


அசோகமித்திரன் கட்டுரைகள் – 2 : முதல் நூலில் அசோகமித்திரனின் அனுபவங்களும் அபிப்பிராயங்களும் இடம்பெற்றுள்ளன. இந்நூலில் கலைகளும் கலைஞர்களும்.

தமிழிலும் பிற மொழிகளிலும் பல்வேறு காலகட்டங்களில் வெளியான முக்கியமான நூல்கள் குறித்தும், ஏராளமான இந்திய, அயல்மொழி எழுத்தாளர்களின் படைப்புகள் மற்றும் வாழ்க்கை குறித்தும் அசோகமித்திரன் எழுதிய கட்டுரைகள் இந்நூலின் முக்கியப் பகுதி. நாடகம், சினிமா போன்ற நுண்கலைகள் குறித்த அவரது அக்கறைகள் தனிப்பகுதியாகச் சேர்க்கப்பட்டிருக்கிறது. இவை அனைத்தும் காலவரிசைப்படி தொகுக்கப்பட்டிருக்கின்றன.

Advertisements

அமுதசுரபி – ஏப். 05

Sify.com :: Amudha Surabi

* பட்ஜெட் 2005
உண்மைதான், இந்த பட்ஜெட் நல்ல பட்ஜெட்தான். புதிய திட்டங்கள் பல கொண்டுவந்துள்ளார்கள். இந்தத் திட்டங் களால் யாருக்கு என்ன நன்மை கிடைக்கிறது என்பதைப் பற்றிய கவனம் போதுமான அளவு யாருக்கும் இருப்பதில்லை. இந்தப் பட்ஜெட்டில் பற்றாக்குறை அதிகப்படியாகாமல் ஓரளவு கட்டுக்குள் வைத்திருப்பதுடன், ஆண்டு வரவு செலவுகளில் பற்றாக்குறை விகிதம் ஓரளவு குறைந்திருப்பது ஒரு பெரிய சாதனை. வரும் ஆண்டில் அது மேலும் கணிசமாகக் குறையுமா என்பதுதான் சந்தேகம்.

* இராணி இரஸோமணி
பச்சைக் கிளிக்குப் பல்இல்லை
பெட்டைக் கோழிக்குக் கிரீடமில்லை
அத்தி மரத்துக்குப் பூ இல்லை
நதி பின் செல்வதில்லை
பின்னே செல்வதில்லை (நாம்) கோஷ்டியாக
சிவன் விஷமருந்தி தொண்டையில் அடக்கி
பார்வதி தியானத்திலமர்ந்து சிவா கண்களைத் திறக்க
வழி விடு, வழி விடு, மங்களகரமான அன்னியர்களே
மலடிகூட குழந்தை பெறுவாள் சிவன் விரும்பினால்

* கவிதைகள்
இதுதான் சாலை கண்மணியே! – நீ
எங்கே செல்ல விரும்புகிறாய்?
இதன்மேல் எத்தனை வாகனங்கள்! – நீ
எதிலே செல்ல விரும்புகிறாய்?
முதலில் செல்வது முக்கியமா?- நீ
முழுதாய்ச் செல்வது முக்கியமா?

* எத்தனை கோடி வளங்கள்!!!
நாம் மரபுசார் வளங்களை முறையாகவும் சிக்கனமாகவும் பயன்படுத்தக் கற்றுக்கொள் வதுடன் உடனடியாக மாற்று எரிசக்தி வளங்களைக் கண்டறிந்து அவற்றைப் பயன்படுத்து வதன் மூலம் வருங்காலத்தினை வளமானதாக ஆக்கிக்கொள்ளலாம். அத்தகைய எரிசக்தி வளங்கள் பின்வருமாறு:-

1.சூரிய ஒளிச் சக்தியும் வெப்ப சக்தியும்
2.காற்றுச் சக்தி
3.உயிரியல், தாவர உயிரியல், கழிவுப் பொருள்களின் சக்தி
4.பிற மாற்று எரிசக்தி வளங்கள்

* அனைத்துலக நகரம் ஆரோவில்லில் மாற்று எரிசக்தி ஆய்வுகள்
இன்றைய நாளில் சுமார் 30 நாடுகளைச் சேர்ந்த 1800 ஆரோவில்வாசிகள் பன்னாட்டு ஆரோவில் மையங்களுடன் இணைந்து சுற்றுப்புற கிராமங்களைச் சேர்ந்த 5000 பணியாளர்களின் உழைப்பு உதவியுடன் 50,000 பேர் வசிக்கத் தகுந்த பசுமை வளையத்துடன் நவீன கட்டடங்களைக் கொண்ட இந்த ஆன்மீக நகரைத் திட்ட மிட்டு அமைத்து வருகின்றனர்.

* இங்கு கனவு காண்பது கற்றுத் தரப்படும்… :: வெ இறையன்பு
நலவாழ்வு குறித்த பிரகடனத்தில் நம் மண் சார்ந்த மூலிகைகள் எப்படி மருத்து வத்தில் முக்கிய பங்கு வகிக்கின்றன என்பதும், உலக வர்த்தகத்தில் மூலிகை மருத்துவத்தில் சீனம் பங்கு பெறுமளவு நாம் பங்களிப்புச் செய்யாமலிருக்கும் குறைபாடும் சுட்டிக் காட்டப்பட்டிருக்கின்றன. சோற்றுக் கற்றாழைக்கு இவ்வளவு மருத்துவ குணமா என்று வியக்க வைக்கும் உதாரணமொன்று மென்மை யாக எடுத்துச் சொல்லப்பட்டிருக்கிறது.

* கவிதாயினி குட்டி ரேவதி
படைப்பாளியின் சமையல் அறையில் மொழி முதலில் ஒன்றும் தெரியாததுபோல் அஞ்சறைப் பெட்டிகளுக்குள் அமர்ந்திருக்கும். ஒரே மாதிரியான உணவுகளை நாள்தோறும் சமைக்கும்போது மொழி, தன் சுவையை இழந்துகொண்டே வருகிறது. புதுமையான சமையலில் மொழி, இதுவரை காட்டாத சுவைகளை வெளிப்படுத்திவிடும். புதுவிதக் கலவைகளை உண்டாக்கும்போது அந்த உணவால் ஊரே மணக்கும்.

நல்ல உணவானது, சூடு, சுவை, மணம், ஆற்றல் ஆகிய நான்கையும் தருவதாய் இருக்கும். நல்ல படைப்பாளி ஒரே மாதிரி சமைக்கமாட்டார். வேதியியல் ஆராய்ச்சிக் கூடத்தில் சோதனைகளில் ஈடுபடுபவரைப் போல் அவரிடம் ஒரு தொடர்ந்த ஆய்வு இருக்கும்.

* நூல் நயம்
பங்குச் சந்தையில் லாபம் : ப. ந. ஜெயராம்
குரு தஷிணாமூர்த்தி சுவாமிகள் அருளுரை : கி. நாகராசன்
அருளாளர்கள் : கவிக்கோ ஞானச்செல்வன்
எனது கனவில் இந்தியா : அ. முகமது இஸ்மாயில்
இந்தியக் குடும்பங்களில் பெருகும் பிரச்சனைகள் : கடமை யள் அன்பு

* இலக்கியம் மூலம் இந்திய இணைப்பு : நூல் நயம்
பல்வேறு மொழிகளில் கூறப்பட்டாலும் இந்திய இலக்கியம் என்பது ஒன்றுதான் என்ற கருத்துக்கு விளக்கவுரையாக வந்திருப்பவை தாம் எழுத்தாளர் சிவசங்கரியின் ‘இலக்கியம் மூலம் இந்திய இணைப்பு’ வரிசைத் தொகுப்புகள். ஏற்கெனவே வெளியான இரண்டு தொகுப்புகளைத் தொடர்ந்து மேற்குத் திசை மாநிலங்களான கோவா, மகாராஷ்டிரம், குஜராத், சிந்து ஆகியவற்றின் இலக்கிய முயற்சிகளைச் சிவசங்கரி தமது மூன்றாவதான இந்தத் தொகுப்பில் திரட்டித் தந்திருக்கிறார்.

* படிக்கக் கிடைத்தவை : நூல் நயம் :: வெங்கட் சாமிநாதன்
விக்கிரமாதித்யன் நிறைய எழுதுகிறவர். நீண்ட காலமாக எழுதி வருகிறவர். அவர் கவிதைகள் வெளிவராத பத்திரிகைகள் ஏதும் உண்டா என்று கேட்டால் உடன் பதில் சொல்லிவிட முடியாது. அவர் ஒரு சுவாரஸ்யமான கவிஞர், மனிதர். பொஹீமியன் என்று சொல்வார்கள், ஆங்கிலத்தில். தன் இச்சையாக தன் வழி செல்பவர். சமூகம் விதிக்கும் கட்டுப்பாடுகள் அவருக்கு உவப்பதில்லை. கவிஞராகவும் அவர் ஒரு பொஹீமியன் தான். அவர் தன் கவிதைகளில் சொல்ல எடுத்துக் கொள்ளும் விஷயங்களும் சரி, கவிதை மொழியும் சரி, அவருடையதேயானவை. அம்மொழியும் வேண்டும் நமக்கு. அவ்விஷயங்களும் வேண்டும் நமக்கு.

* நாட்டின் மின் தேவைக்கு அணுவாற்றல்
நம் நாட்டின் முதல் அணுமின் நிலையம் மகாராஷ்டிர மாநிலத்தில் தாராபூர் என்னு மிடத்தில் அமெரிக்க உதவியுடன் 1964இல் நிறுவப்பட்டது. இரண்டாவதாக, ராஜஸ்தான் மாநிலத்தில் ராவத்பாட்டா என்னுமிடத்தில் கனடா நாட்டு உதவியுடன் மற்றொரு அணுமின் நிலையம் நிறுவப்பட்டது. அதன் பிறகு, இதுபோன்ற அணுமின் நிலையங்கள் “நமக்கு நாமே’ என்கிற அடிப்படையில் அயல்நாட்டு உதவியின்றி நம் நாட்டிலேயே வடிவமைத்து கட்டப்பட்டு வருகின்றன. இவை அனைத்தும் கனநீர் உலைகள் ஆகும். மொத்தம் 14 அணு உலைகள் தற்போது நம்நாட்டில் சிறப்பாக இயங்கி வருகின்றன.

* தெய்வீக உடல்
ஓர் இறையுடலிலே ஓர் இறைவாழ்க்கை. இதுதான் நாம் எதிர்நோக்கியிருக்கும் இலட்சியத்தினுடைய வழிமுறை. ஆனால் இந்த இறையுடல் என்பது என்ன? இவ்வுடலின் பண்பு எத்தகையதாக இருக்கும்? இதன் கட்டமைப்பு, செயல்பாட்டு முறைகள் எப்படி இருக்கும்? தற்போது நமக்குள்ள பல குறைபாடுகளுடன் கூடிய, குறுகிய எல்லைக்கு உட்பட்ட உடலிலிருந்து அந்தப் புதிய, பூரண உடலை எப்படி வேறுபடுத்திக் காண முடியும்? இந்த மண்ணுலகில், மண்ணியலையே அடிப்படையாகக் கொண்டு இயங்கப் போகும் அந்த உடல் வாழ்க்கையின் நடைமுறை என்னவாக இருக்கும்?

* வெப்பக் கூடு கருவாடு
நெய்த்தலை (நெத்தலி), மிகச் சிறிய மீன்; சாலை, சிறிய மீன்; இவற்றை அப்படியே உப்பில் முதலில் ஊறவைக்கலாம். பின்னர் வெயிலில் காயவிடலாம். சுறா, பேய்ச்சாலை போன்ற பெரிய மீன் வகைகளின் உடலை அறுத்துப் பிளந்து, தசைப் பகுதியைக் கீறி உப் பிடலாம், பின்னர் காயவைக்கலாம். உப்பூறல் உடலின் நீர்ப் பங்கையும் வேதி மாற்றத்தையும் குறைக்கும், கிருமிகளையும் அறுகாலிகளையும் அணுகவிடா. காயவைத்தலால் உடலின் நீர்ப் பங்கு கணிசமாகக் குறையும். காய்ந்த மீனில் உணவுச் சத்துக் கெடுவது மிகக் குறையும். மீன் இறந்து சில ஆண்டுகள் வரை அதன் உணவுச் சத்தைக் கருவாடாகப் பேணலாம்.

* சவாலே சமாளி
கூட்டம் நடந்துகொண்டிருக்கையில், ஆணையாளரும் பரபரப்புடன் வந்து சேர்ந்தார். அதே சமயத்தில், எங்கள் எல்லோரையும் வம்பு செய்து வேடிக்கை பார்த்த சுற்றறிக் கையும் பொள்ளாச்சி தாலுகா அலுவலகக் கடைநிலை ஊழியர் மூலம் வந்தது. அதைக் கூட்டத்திலிருந்த துணை ஆட்சியருக்குத் தெரிவித்தோம்.

தலைக்கு வந்தது, தலைப்பாகையோடு போயிற்று!

* பணம் – வாமன கதை :: ரேவதி பாலு
வேலை செய்யும்போது பக்கத்திலேயே நின்று திருத்தங்கள் சொன்ன அய்யாவும் அம்மாவும், வேலை முடிந்து கூலிக்காக நின்ற போது, “நாளைக்கு வாயேம்ப்பா! வாங்கிக் கிட்டுப் போயிடலாம்!’ என்று சர்வ சாதாரண மாகச் சொன்னபோது, நாள் முழுவதும் வேலை செய்த உடல் அசதியோடு மனவலியும் சேர்ந்துகொண்டது செல்வராஜூக்கு.

* தேவன் வருவாரா? :: ஜெயகாந்தன்
“அதோ நெலாவிலே பாரேன்…. அன்னக்கி என் தேவன் அங்கேருந்துதான், இறங்கி வந்தார்…. ஆயா, அந்தத் தேவனோட ஒடம்பு தங்கம் மாதிரி சொலிச்சிது. அவரு நெலாவிலேருந்து எறங்கி வந்து என்கிட்டே பேசினார். நான் இந்த மரத்தடியிலே படுத்திருந்தேன்… அவரைப் பார்த்துச் சிரிச்சேன்…. நெலவுக்கும் தரைக்குமா, சரிவா ஒரு பாலம் மாதிரி போட்டிருந்தது…. அவரு வரும்போது அந்த பாதை மறைஞ்சிப் போச்சு… ஒவ்வொரு அடி எடுத்து வைக்கும்போதும் அந்தப் பாலம் ஒவ்வொரு அடி மறைஞ்சி போச்சு…

* தமிழ் இலக்கியத்தில் ஜெயகாந்தன் தடம் :: திருப்பூர் கிருஷ்ணன்
“கடந்த கால எழுத்தாளர்களில் நீங்கள் ஒரே ஒருவரைத்தான் சொல்ல வேண்டும் என்றால் யாரைச் சொல்வீர்கள்?’ என்று கேட்டேன். புதுமைப்பித்தன் பெயரைச் சொல்வார் எனக் காத்திருந்தேன். ஆனால் யோசித்துவிட்டு “அழகிரிசாமி’ என முணு முணுத்தார் அவர். “இப்போது இருப்பவர்களில் ஒருவரை மட்டும் சொல்லவேண்டுமானால்?’ எனக் கேட்டேன். யோசிக்காமல் தயக்கமின்றி “ஜெயகாந்தன்’ என்று தெரிவித்தார்.

* புதுப்பிக்கத்தக்க எரிசக்தி வளங்கள் :: ஜெ ஜெயலலிதா
இந்த நேரத்தில், கிராமப் புறங்களில் உள்ள வீடுகளில் சாண எரிவாயுக் கலன்கள் பிற வாயுக் கலன்களை அமைத்தும்; விவசாயப் பெருமக்கள் சூரிய சக்தி பம்புகளை விவசாயத்திற்கும் குடிநீருக்கும் பயன்படுத்தியும்; தொழிற் சாலைகள், தாவர எரிவாயுக் கலன்களை, சூரிய வெப்பக் காற்று மற்றும் சுடுநீர்க் கலன்களை அமைத்தும்; மின்சாரத்தைச் சேமித்துப் புதுப்பிக்கத்தக்க எரிசக்தி வளங்களைப் பயன்படுத்திக்கொள்ள முன் வரவேண்டும் என்று அன்புடன் கேட்டுக் கொள்கிறேன்.

* வெற்றித் திருமகள் : சுதாராணி ரகுபதி
பெங்களூரில் பிறந்தவர்; மைசூர் பல்கலைக்கழகத்தில் தத்துவத்திலும் சமூகவியலிலும் பட்டம் பெற்றவர்; கே.பி. கிட்டப்பா பிள்ளை, யு.எஸ். கிருஷ்ணா ராவ், மயிலாப்பூர் கெüரி அம்மாள் ஆகியோரிடம் பரதக் கலையைப் பயின்றவர்; வயலின் மேதை செüடையா, வாகேயகாரர் வித்து வான் மதுரை என். கிருஷ்ணன் ஆகியோரிடம் இசைப் பயின்றவர்; சிறு வயதிலேயே பாரதப் பிரதமர் ஜவகர்லால் நேரு உள்ளிட்ட பல பிரமுகர்கள் முன் பரதநாட்டியத்தை மேடையேற்றியவர்.

* புதிய திசையில் பயணிப்போம்!
காற்றாலை மின்சாரம், சூரிய ஒளியிலிருந்து மின்சாரம், கடல் அலை மின்சாரம், சாண எரிவாயுக் கலன்கள், அணுவைப் பிளந்து மின்சாரம், ஹைட்ரஜன் சக்தி… என எண்ணற்ற முறைகளில் மின்சாரம் தயாரித்து வருகிறார்கள். தாவரக் கழிவுகள், கரும்புச் சக்கை, நகரக் கழிவு, தொழிற்சாலைக் கழிவு, ஜவ்வரிசி – மரவள்ளிக் கிழங்கின் கழிவு, கோழி எச்சம் ஆகியவற்றிலிருந்தும் மின்சாரம் தயாரிக்க முடிகிறது.

இயக்குநர் செல்வராகவன்

Ananadha Vikadan :: என் குடும்பத்தினர் யாரையும் என்னால் நேராகப் பார்த்துப் பேச முடியாது. யார் என்ன பேசினாலும், நான் தண்டமாக இருக்கிறேன் என்று குத்திக்காட்டுவது போல் இருந்தது! அப்போதெல்லாம், கடவுள் என் முன்னால் வந்து எனக்கு எதிரில் அமர்ந்து கால் மேல் கால் போட்டபடி பேசிவிட்டுப் போவார்.

என் அப்பா கேட்டவுடன், ‘என் கதையைத்தான் முதலில் எடுப்பேன்!’ என்று அடம் பிடிக்காமல், ‘சரி’ என்று சொன்ன அந்த ஒரு சிறிய பதில்தான், என்னை அடுத்த கட்டத்துக்கு அழைத்துச் சென்றது. எவ்வளவு சிறிய வாய்ப்பிருந்தாலும், அதில் முன்னேற்றத்துக்கு ஒரு துளி தென்பட்டாலும் சம்மதித்து, சவாலை ஏற்பது உத்தமம்!

இன்றைய இளைஞர்களிடம் எனக்குப் புரியாதது இதுதான். எத்தனையோ சின்னச் சின்ன நல்ல வாய்ப்புகளையெல்லாம் கோட்டை விட்டுவிட்டு, வாழ்க்கையெல்லாம் புலம்பியபடி திரியும் எத்தனையோ இளைஞர்களைப் பார்த்திருக்கிறேன். காற்றிலே ஒரு நூல் பறந்து வந்தாலும், அதைப் பிடித்து முன்னுக்கு வர மாட்டேன் என்று வறட்டுக் கௌரவம் பார்க்கிறார்கள். அவர்களுக்கு ஒரே ஒரு வார்த்தை… ‘காற்றுள்ளபோதே தூற்றிக்கொள்’ என்று சொல்லி வைத்த முன்னோர்கள் முட்டாள்கள் இல்லை!

இப்படி அட்வைஸ் சொல்கிற அளவுக்கு நான் பெரியவன் இல்லை. அது எனக்கும் தெளிவாகத் தெரியும். ஆனாலும் காதல், கனவு, வாழ்க்கை பற்றிய என் வாழ்க்கைப் பாடங்கள் உங்களுக்கும் பயன்பட வேண்டும் என்கிற ஆசையில்தான் எழுதினேன்… ‘கனா காணும் காலங்கள்!’

புள்ளி

ஜெயபாஸ்கரன் :: Aaraamthinai – ilakkiyam/kavithai

எதற்கெடுத்தாலும்
”புள்ளி’வைத்துப்
பழகி விட்டார்கள்
மனிதர்கள்.

பிடிக்காத பெயர்கள் மீது
‘புள்ளி’ வைத்து ஒதுக்குவதே
வேலையாகிவிட்டது
பல பெரும் ‘புள்ளி’களுக்கு.

பிரச்சனைகளுக்குத்
தீர்வு காண்பதை விடவும்
அதற்கொரு முற்றுப் ‘புள்ளி’
வைப்பதில்தான்
ஆர்வமாக இருக்கிறார்கள்
எல்லோரும்.

தற்காலிகமான
முற்றுப் ‘புள்ளி’ யைத்
தகர்த்துத் தாண்டுவது
ஒரு பிரச்சனையாகவே இருப்பதில்லை
பிரச்சனைகளுக்கு.

கரும்புள்ளி
செம்புள்ளி’யை தவிர்த்துவிட்டு
‘கரும்புள்ளி’யை மட்டும்
குத்துகிறார்கள்
தேர்தல் தோறும்
வாக்காளர்களுக்கு.